மோடி அலை அல்ல. மோசடி அலை : உதயக்குமார் நேர்காணல்

ஏறத்தாழ மூன்று ஆண்டுகளுக்கு பிறகு இடிந்தகரையை விட்டு வெளியே வந்துள்ளார் உதயக்குமார். சென்னைக்கு வந்திருந்த அவரை சவுக்கு சார்பாக எடுத்த நேர்காணல்.

அரசியலில் இருந்து முழுமையாக விலகி இருந்த அணு உலை எதிர்ப்பு போராட்டக் குழு தற்போது ஆம் ஆத்மி கட்சியில் இணைய வேண்டிய கட்டாயம் என்ன? வழக்குகளில் இருந்து விடுதலை பெறுவதற்கான உத்தியா ?

அணு உலைக்கு எதிரான போராட்டத்தைத் நாங்கள் தொடங்கும்போது எந்தக் காரணம் கொண்டும் அரசியலுக்கு வரமாட்டோம் என்று உறுதி அளித்து இருந்தோம். போராட்டத்தை தொடங்கி வெற்றிகரமாக நடைபெற்றது. அப்போது தேசியக் கட்சிகள், மற்ற மாநிலங்களில் செயல்படும் கட்சிகள் என ஏறத்தாழ இந்தியாவில் உள்ள அனைத்துக் கட்சிகளுக்கும் கடிதம் எழுதி, தேசிய அணுசக்திக் கொள்கை நாடு முழுவதும் விவாதிக்கப்பட வேண்டும். வெளிப்படைத் தன்மை வேண்டும். அதற்கான முயற்சிகளுக்கு நீங்கள் ஆதரவளிக்க வேண்டும் என்று குறிப்பிட்டு இருந்தோம். ஆனால், எந்தக் கட்சியிடம் இருந்தும் எங்களுக்கு பதில் வரவில்லை. கடிதம் கிடைத்தது என்று கூட எங்களுக்குப் பதில் வரவில்லை.

தமிழகத்தில் எங்களை ஆதரித்த விடுதலைச் சிறுத்தைகள், பா.ம.க., ம.தி.மு.க. போன்ற கட்சிகள் மீது நாங்கள் மிகப்பெரிய எதிர்பார்ப்பு வைத்திருந்தோம். அணு உலை விவகாரத்தில் அவர்கள் ஒரு போதும் எந்த சமரசமும் செய்து கொள்ளமாட்டார்கள் என்று நம்பினோம். ஆனால், தேர்தல் நெருங்கியதும் எங்களை விட்டுவிட்டு, எங்களுக்கு எதிரான நிலைப்பாடு கொண்ட கட்சிகளோடு அவர்கள் உடன்பாடு செய்து கொண்டார்கள். நாங்கள் தனித்துவிடப்பட்டோம்.

ஒரே இடத்தில் முடக்கப்பட்டோம். போராட்டத்தை அடுத்த கட்டத்திற்கு எப்படி எடுத்துச் செல்வது என்று தெரியவில்லை. மீண்டும் ஒரு பெரிய கிளர்ச்சியை நடத்தி, கைதாகி சிறைக்குப் போகலாம்.

ஆனால், அதனால் என்ன நேர்ந்துவிடும் ? இடிந்தகரைக்குள் போலீஸ் நுழைந்து போராட்டப் பந்தலை பிரித்துப் போட்டுவிட்டு போய்விடும். இதுநாள் வரை எங்கள் மக்கள் போராடிய போராட்டம், செய்த தியாகம், எதுவும் வெளி உலகிற்கு தெரியாமல் போய்விடும். இதைப் பற்றி எங்கள் மக்களோடு நாங்கள் விவாதித்து, இந்தப் போராட்டத்தை அரசியல் தளத்திற்கு கொண்டு செல்லலாம் என்று முடிவெடுத்தோம்.

அந்த நேரத்தில்தான், டிசம்பர் 28 அரவிந்த கெஜ்ரிவால் முதலமைச்சராக பொறுப்பேற்கிறார். அதற்கு மறுநாள் பிரஷாந்த் பூஷன் அவராகவே எங்களை வந்து சந்தித்து அழைப்பு விடுத்தார். அந்த அழைப்பு பற்றி எங்கள் மக்களிடம் விவாதித்தோம். ஐந்து நிபந்தனைகள் விதிப்பது என்று முடிவு செய்தோம். அவற்றை ஏற்றுக் கொள்வதாக ஆம் ஆத்மி கட்சியில் இருந்து எழுத்துப்பூர்வமாக பதில் அனுப்பினார்கள். அந்தப் பதிலையும் எங்கள் மக்கள் முன்னால் வைத்து விவாதித்தோம். அதன்பிறகு, அதில் அறுதிப்பெரும்பான்மை மக்களின் முடிவின்படி நாங்கள் எளிய மக்கள் கட்சியில் இணைந்தோம்.

அந்த முடிவுதான் இன்றுவரை எங்களை உயிர்ப்புடன் வைத்துள்ளது. அந்த முடிவை எடுத்திருக்காவிட்டால், என்றோ நாங்கள் நீர்த்துப் போய் இருப்போம். நீங்கள் எல்லாம் எங்களை முழுக்க மறந்திருப்பீர்கள். இந்த முடிவால் எங்கள் மக்களுக்கு கிளைப் பயன்களும் கிடைத்துள்ளன. போராடிக் கொண்டு இருக்கும் மக்களுக்கு போராட்டக் களத்தில் இருந்து தற்காலிக விடுதலை கிடைத்துள்ளது.

எங்கள் மீது போடப்பட்ட வழக்குகளுக்குப் பயந்து கொண்டு, நாங்கள் இந்த முடிவை எடுத்துள்ளோம் என்று விமர்சிப்பவர்கள் ஒன்றை உணர வேண்டும். எங்கள் கொள்கைக்கு நேர் முரணாக நிற்கக்கூடிய ஜெயலலிதா மற்றும் கருணாநிதியின் கால்களில் போய் நாங்கள் விழுந்துவிடவில்லை. நாணயத்தின் இரண்டு பக்கங்களைப்போல், இயங்கிக் கொண்டு இருக்கக்கூடிய காங்கிரஸ் மற்றும் பாரதிய ஜனதாக் கட்சிக்கு மாற்றாக செயல்படக்கூடிய ஒரு கட்சியில் எங்களை இணைத்துக் கொண்டுள்ளோம். இதில் எந்தத் தவறும் இருப்பதாக நாங்கள் கருதவில்லை.

ஆம் ஆத்மி கட்சியில் இருந்து இதற்காக நிறைய பணம் கைமாறியதாக ஒரு குற்றச்சாட்டு சொல்லப்படுகிறதே?

அணு உலைப் போராட்டம் உச்சத்தில் இருந்தபோது எங்களுக்கு எத்தனை கோடிகள் விலை வைக்கப்பட்டன என்பது உங்களுக்குத் தெரியாது. நான் விரும்பும் நாட்டில் சகல வசதிகளுடன் குடும்பத்தோடு குடியேற்றுவதற்கு எனக்கு தூது அனுப்பப்பட்டது. அதற்கு இணங்காத நாங்களா பணத்திற்கு இப்போது இணங்கிவிடப்போகிறோம். ஆம் ஆத்மி கட்சி இதுவரை எங்களுக்கு பணம் எதுவும்

கொடுக்கவில்லை. இனிமேல் கொடுப்போம் என்றும் சொல்லவில்லை. நாங்களும் பணம் பற்றி எதுவும் கேட்கவும் இல்லை.

கூடங்குளம் அணு உலைப் போராட்டம் குறித்து பற்றி ஆம் ஆத்மியின் நிலைப்பாடு . அவர்கள் உங்கள் போராட்டத்துக்கு ஆதரவு தெரிவிக்கிறார்களா ?

நாங்கள் விதித்த 5 நிபந்தனைகளில் இந்தக் கேள்வியைத்தான் முதல் நிபந்தனையாக வைத்திருந்தோம். அதற்கு எழுத்துப்பூர்வமாக அவர்கள் அளித்த பதில், “உள்ளூர் மக்களின் ஒத்துழைப்பும் சம்மதமும் இல்லாமல் அணுசக்தி திட்டம் உள்பட எந்த ஒரு திட்டத்தையும் அனுமதிக்கக் கூடாது என்பதுதான் அவர்களின் நோக்கமும்” என்பது. எங்களுடைய போராட்டத்தை முழுமையாக அங்கீகரிப்பதாக உறுதியளித்தார்கள். எங்களுக்கும் அதில் திருப்தி. ஏனென்றால், நாங்கள் கூடங்குளம் அணு உலையை மட்டும் எதிர்க்கவில்லை. கல்பாக்கம் அனல் மின்நிலையம், தேனி தேவாரம் நியூட்ரினோ திட்டம், மதுரை வடபழஞ்சி, மீத்தேன், கெயில் என அனைத்தையும் எதிர்க்கிறோம். இந்தியாவின் அணு சக்தி கொள்கை பற்றி நாடு முழுவதும் பரந்துபட்ட விவாதம் நடத்தி அதன்பிறகுதான் நடைமுறைப்படுத்த வேண்டும் என்பதுதான் எங்களின் கொள்கையும். அதையே அவர்களும் உறுதியளித்தார்கள்.

அணு உலைப் போராட்டத்தில் ஜாதி, மதம் கடந்து உங்கள் பின்னால் மக்கள் இருந்தனர். மாற்றுக் கட்சிக்காரர்களும் உங்களை ஆதரித்தார்கள். தற்போது நீங்கள் ஆம் ஆத்மியில் சேர்ந்து ஒரு கட்சி சார்புடையவராக மாறி இருப்பது அந்த மக்களுக்கு செய்த ஓர துரோகம் இல்லையா?

கம்யூனிஸ்டுகள், காங்கிரஸ், பி.ஜே.பி, தி.மு.க, அதிமுக போன்ற கட்சிகளோ அந்தக் கட்சிகளுடைய தொண்டர்களோ எங்களுடைய போராட்டத்தை ஒருபோதும் ஆதரிக்கவில்லை. அவர்கள் போராட்டப் பந்தல் பக்கம் கூட ஒதுங்கவில்லை. ஆனால், மாநிலக்கட்சிகளான பா.ம.க., விடுதலைச் சிறுத்தைகள், ம.தி.மு.க.,வினர் எங்களை ஆதரித்தனர். ஆனால், அதில் விடுதலைச் சிறுத்தைகள் கட்சியினர் அணு உலையை ஆதரிக்கக்கூடிய தி.மு.க.வுடனும், ம.தி.மு.க. மற்றும் பா.ம.க. அணு உலையை ஆதரிக்கக்கூடிய பி.ஜே.பி.யுடனும் கைகோர்த்துவிட்டனர். இதை எப்படி நாங்கள் ஏற்றுக் கொள்ள முடியும். மேலும், மற்றக் கட்சிக்காரர்கள் யாரையும் நாங்கள் இழுத்துப் போகவில்லை. எங்களோடு தோளோடு தோள் நின்ற மக்கள், அவர்கள் போராட்டத்தை யார் ஆதரிப்பார்களோ அவர்கள் பக்கம் வந்துள்ளனர். இதுவும் நான் தனியொருவனாக எடுத்த முடிவல்ல. ஜனநாயகப்பூர்வமான முறையில், சமுதாயத் தலைவர்களை ஒன்றுகூட்டி, எங்கள் மக்களோடு ஆலோசித்து எடுத்த முடிவு தான்.

எளிய மக்கள் கட்சியின் வேட்பாளரான உதயக்குமார் எளியவர் அல்ல… அவருக்கு ஏழு கோடி ரூபாய் சொத்து இருக்கிறது என்ற விமர்சனம் எழுந்துள்ளதே…. ?

எளிய மக்கள் கட்சி என்பதன் அர்த்தம் எளிய மக்களுக்காக நிற்கிற கட்சி என்பதுதான். அந்தக் கட்சியின் கொள்கையைப் ஏற்றுக் கொண்டவர்கள் அதில் சேர்ந்து பணியாற்றலாம். அவர்கள் படித்தவர், ஏழை, பணக்காரர் என்று எப்படி வேண்டுமானாலும் இருக்கலாம். எளியமக்கள் கட்சி என்பதால், அதன் உறுப்பினர்களும் நிர்வாகிகளும் சைக்கிள் வைத்திருக்கக்கூடாது, நல்ல ஆடைகள் உடுத்தி இருக்கக்கூடாது, வீடு வைத்திருக்கக்கூடாது என்றெல்லாம் அர்த்தம் இல்லை.

ஏழு கோடி ரூபாய் சொத்து….

இந்த சொத்துக்கள் எனது பரம்பரை சொத்துக்கள். நான் இப்போது சம்பாதித்தவை கிடையாது. அந்த சொத்துக்களை நான் குறைத்து மதிப்பிட்டு மனுத் தாக்கல் செய்திருக்க முடியும். தற்போது சொத்துக் கணக்கை தாக்கல் செய்த பல வேட்பாளர்கள் சந்தை மதிப்பை விட குறைத்தே காட்டியிருக்கிறார்கள். ஆனால், நான் அந்த சொத்துக்களின் இன்றைய சந்தை மதிப்பை அப்படியே தாக்கல் செய்துள்ளேன். வருமான வரித்துறை, அமலாக்கப் பிரிவு, மத்திய புலனாய்வுத் துறை என்று மத்திய அரசின் கட்டுப்பாட்டில் உள்ள அத்தனை துறைகளும், என்னை எப்படியாவது சிக்க வைக்க முடியுமா என்ற கடந்த மூன்று ஆண்டுகளாக விசாரித்து வந்துள்ளனர். ஆனால், நான் சட்டவிரோதமாக எந்த காரியத்தையும் செய்ததாக அவர்களால் எதையும் கண்டு பிடிக்க முடியவில்லை. நானும் போராட்டக் குழுவினரும் உண்ணாவிரதம் இருந்தபோதே, நாங்கள் சாப்பிட்டு விட்டு உண்ணாவிரதம் இருக்கிறோம் என்று பொய்ப்பிரச்சாரம் செய்தனர். அது போலத்தான் என் மீது தற்போது தாக்கல் செய்துள்ள குற்றச்சாட்டும்.

ஆம் ஆத்மி கட்சியை காங்கிரஸ், பி.ஜே.பி.க்கு மாற்று என்று சொல்கிறீர்கள் ? ஆனால், ஆம் ஆத்மி கட்சி பல்வேறு விஷயங்களில் தங்கள் நிலைப்பாட்டை தெளிவுபடுத்த வில்லையே ?

ஆம் ஆத்மி கட்சி தொடக்க நிலையில் இருக்கிற கட்சி. அதன் கொள்கைகள் இன்னும் முழுமையாக வரையறுக்கப்படவில்லை என்பது உண்மைதான். ஆனால், ஆண்டாண்டு காலமாக இந்தியாவில் இருக்கிற மற்றக் கட்சிகளுக்கு எல்லாம் தெளிவான கொள்கை ஒன்று உள்ளதாக நீங்களாக கற்பனை செய்து கொள்ளாதீர்கள். இன்று இந்தியாவில் இருக்கக்கூடிய எந்தக் கட்சிக்காரனையாவது அழைத்து அவருடைய கட்சியின் கொள்கை பற்றிப் பேசச் சொல்லுங்கள் பார்க்கலாம். தலைவர்களுக்கே தங்கள் கட்சியின் கொள்கை என்னவென்று தெரியாத காலம் இது. அண்ணா நாமம் வாழ்க என்பது ஒரு கட்சியின் கொள்கை. அண்ணா வழியில் அயராது உழைப்போம் என்பது மற்றொரு கட்சியின் கொள்கை. இயன்றதைச் செய்வோம் இல்லாதவருக்கே என்ற கோஷம் ஒரு கட்சிக்கு. இதெல்லாம் கொள்கைகளா?

ஆனால், இந்தக் கட்சிகளோடு ஒப்பிடும் போது, ஆம் ஆத்மி ஒரு குழந்தை. குழந்தை இப்போதே ஏன் மாரத்தானில் ஓடமாட்டேன் என்கிறது என்று கூச்சல் போடுவது சரியல்ல. அது தவழ வேண்டும். நடை பழக வேண்டும். அதன்பிறகு தான் ஓடும். தற்போது ஆம் ஆத்மியில் கொள்கைகள் குறித்த விவாதம் நடைபெறுகிறது. அதில் எங்களுடைய பங்களிப்பும் இருக்கிறது. குறிப்பாக மீனவர் பிரச்சினை, ஈழத் தமிழர் பிரச்சினை, நதி நீர் இணைப்பு, சமூக நீதி, சிறுபான்மையினர் உரிமை, தாது மணல் கொள்ளை உள்ளிட்ட விஷயங்களில் கட்சி ஒரு நிலைப்பாடு எடுக்கும்போது எங்களின் கருத்துக்களை கண்டிப்பாக கேட்க வேண்டும் என்று நாங்கள் சொல்லி இருக்கிறோம். கொள்கை வகுப்பதை பொறுத்தவரை அதற்கு இன்னும் பத்து வருடங்கள்கூட ஆகலாம்.

உங்களுடைய வெற்றி வாய்ப்பு எப்படி இருக்கிறது?

வெற்றி வாய்ப்பைப் பற்றிக் கவலைப்படவில்லை. அதற்காகவோ அல்லது தோற்றுவிடுவோம் என்ற அச்சத்திலோ நான் தேர்தலில் போட்டியிடவில்லை. பொருளாதாரக் கொள்கை, ராணுவக் கொள்கை, அணுசக்திக் கொள்கை என தேசியக் கொள்கைகள் அனைத்திலும் ஒரு தீர்க்கமான முடிவெடுக்க வேண்டிய கட்டாயத்தில் நாடு உள்ளது. ஏனென்றால், இந்தக் கொள்கை முடிவுகளை எடுப்பதில் இதுவரை ஆட்சியில் இருந்த காங்கிரஸும் பி.ஜே.பி.யும் முற்றிலுமாக தோற்றுவிட்டன. இப்போது ஒரு மாற்று தேவை. அந்த மாற்றை நாங்கள் முன்வைக்கிறோம். அதற்கு ஆதரவாக நானும் தேர்தலில் போட்டியிடுகிறேன். இந்த நாட்டை மீண்டும் பழைய அரசியல் வியாபாரிகளிடமே கொடுத்து உங்களின் எதிர்காலத் தலைமுறைகளின் வாழ்வையும் நசுக்கப்போகிறீர்களா? அல்லது மாற்று அரசியலுக்காக விளைந்து நிற்கிற எங்களை ஆதரிக்கப்போகிறீர்களா? என்ற கேள்வியை முன்வைத்து நான் போட்டியிடுகிறேன். இதன் முடிவை தேர்தல் முடிவுகள் அறிவிக்கும்போது தெரிந்து கொள்ளலாம்.

கோடிக்கணக்கில் வாரி இறைக்கும் பெரிய கட்சிகளுக்கு மத்தியில் நீங்கள் தேர்தல் செலவுக்கு என்ன செய்யப் போகிறீர்கள்?

மக்களிடம் வரி பிரிக்கிறோம். வேட்பாளர் என்ற முறையில் நான் சற்று கணிசமான தொகையை செலவழிக்கிறேன். அதற்கு கூடுதலாக நான் ஒரு பைசா செலவு செய்யமாட்டேன் என்பதையும் கட்சிக்கு தெளிவுபடுத்தி இருக்கிறேன். எனக்கு சொத்துக்கள் இருப்பது உண்மைதான். ஆனால், அந்த சொத்துக்கள் தினம்தோறும் லட்சக்கணக்கில் வருமானம் ஈட்டித் தரக்கூடிய சொத்துக்கள் அல்ல. எனக்கு 54 வயதாகிவிட்டது. இந்த நேரத்தில் என்னிடம் இருக்கும் சொத்துக்களை எல்லாம் விற்று தேர்தலில் போட்டியிட்டு அதன்பிறகு நான் விற்ற சொத்துக்களைவிட பலமடங்கு திருடி வாங்கும் திட்டமும் எனக்குக் கிடையாது. என்னால் எதை சமாளிக்க முடியுமோ அதை நான் செலவழிக்கிறேன்.

விளம்பரம் மற்றும் பிரச்சாரங்களில் மற்றக் கட்சிகளுடன் எங்களால் நிச்சயமாக போட்டியிட முடியாது. நாங்கள் மக்கள் கூடும் இடங்களில் பேசப்போகிறோம். முதல் தலைமுறை வாக்காளர்களான கல்லூரி மாணவர்களைப் போய் சந்திக்கிறோம். அவர்களுக்கு மாற்று அரசியல் பற்றி புரியவைத்துப் பேசுகிறோம். அவர்களும் நன்றாகப் புரிந்து கொள்கிறார்கள். அது ஒரு உணர்வுப்பூர்வமான நிகழ்வுகளாக இருக்கிறது. வர்த்தகர்கள், மீனவர்கள், விவசாயிகள், பெண்கள், இளைஞர்களைச் சந்தித்து அவர்கள் தொடர்பான பிரச்சினைகளையும் பேசுகிறோம்.

உச்ச நீதிமன்றம் சொன்னதுபோல், உங்கள் மீது போடப்பட்ட வழக்குகள் அனைத்தும் வாபஸ் பெறப்படவில்லையே. இதில் தமிழக அரசின் செயல்பாடுகளை எப்படி பார்க்கிறீர்கள்?

தமிழக அரசின் ஏமாற்று வேலை. உச்ச நீதிமன்றம் கடந்த வருடம் மே 6ம் தேதி தீர்ப்புச் சொல்லும்போது அத்தனை வழக்குகளையும் அணு உலை தொடர்பாக அந்த மக்களின் மீது போடப்பட்ட வழக்குகள் அனைத்தையும் வாபஸ் பெற வேண்டும் என்று தீர்ப்புச் சொன்னது. அப்படியில்லாமல் 248 வழக்குகளை மட்டும் வாபஸ் வாங்க வேண்டும் என்று சொல்லவில்லை. தமிழக அரசு எங்களை கட்டுக்குள் வைத்துக் கொள்வதற்காக நடத்தும் ஒரு நாடகம். ஆனால், மீதமிருக்கும் நூற்றிச் சொச்சம் வழக்குகளைக் கண்டு நாங்கள் பயப்படவில்லை. அதில் எங்களுக்குத் தூக்குத்தண்டனை கிடைக்கும் என்றால் கிடைத்து விட்டுப் போகட்டும்.

ஆம் ஆத்மி கட்சியில் வட இந்திய அடையாளங்கள் நிறைய இருக்கின்றன. தமிழகத்தில் எடுபடுமா? இல்லை இங்குள்ள சூழலுக்கு ஏற்றவாறு ஏதேனும் மாற்றங்கள் கொண்டு வரப்படுமா?

தமிழகத்தில் எளிய மக்கள் தலைப்பாகை கட்டுகிறார்கள். நானும் அதையே விரும்புகிறேன். அவர்கள் தற்போது பயன்படுத்தும் குல்லாய் நமக்கு அந்நியமாக இருக்கிறது. நான் அது பற்றி அவர்களிடம் பேசி வருகிறேன். அதுபோல், தனிப்பட்ட நபரை முன்நிறுத்துவது, வட இந்திய சிந்தாந்தத்தை முன்னிறுத்துவது கூடாது என்று இங்குள்ளவர்களிடம் வலியுறுத்தி வருகிறேன். இதுபோல், சிற்சில மாற்றங்களை கொண்டுவருவது குறித்து பேசி வருகிறேன். துடைப்பம் சின்னத்தைப் பொறுத்தவரை அது அப்படியே இருக்கட்டும் என்பதுதான் என்னுடைய விருப்பமும். குப்பைகளை அப்புறப்படுத்தும் ஆயுதம் அல்லவா அது.

மோடி அலை மற்றும் வலுவாக அமைந்துள்ள பாரதிய ஜனதாக் கூட்டணி பற்றி?

அது மோடி அலை அல்ல. மோசடி அலை. நான் பார்த்தவரை மோடி அலையும் இல்லை. வலையும் இல்லை. நிறைய பணம் வைத்திருக்கிறார்கள். அதைப்போட்டு பாப்புலாரிட்டி உருவாக்குகிறார்கள். பாரதிய ஜனதாக் கட்சியில் இருக்கும் தே.மு.தி.க.வின் அரசியல், பா.ம.க., ம.தி.மு.க.வின் அரசியலை எல்லாம் தமிழக மக்கள்

ஏற்கனவே நன்கு அறிந்தவர்கள். இனியும் அவர்களிடம் ஏமாற மாட்டார்கள் என்று நினைக்கிறேன்.