போதையின் பிடியில்… ….

ஒரு ஹோட்டலுக்கு குடும்பத்தோடு உணவருந்த செல்கிறீர்கள். அந்த ஹோட்டலில் உங்களை பரபரப்பாக கவனித்து, பெரும்புள்ளி போல நடத்தினால், உங்களை கவனித்த பணியாளுக்கு கூடுதலாக டிப்ஸ் அளிப்பீர்கள். அந்த பரபரப்பான கவனிப்பை விரும்பாதவர்கள் இருக்க முடியுமா ? நமது ஈகோவை திருப்தி செய்யும் கவனிப்பு அது. மனிதர்களாகிய நமக்குள் புதைந்திருக்கும் குணம் அது. அது ஒரு போதை என்பதை நாம் உணராமல் அதற்கு அடிமையானால் நமது ஆளுமையே மாறிப்போய், அந்த போதைக்காக எதை வேண்டுமானாலும் செய்யத் தயாராவோம்.

சாதாரண அரசு ஊழியர்களுக்கே இந்த போதை அதிகமாக உண்டு. அரசு நிர்வாகத்தில், பதவி மற்றும் அதிகார சுகத்தை அனுபவிக்கும் அரசு ஊழியர்கள் ஓய்வு பெற்ற பிறகு மிகவும் சிரமப்படுவார்கள். காவல்துறையில் இது மிக அதிகம். சென்னை மாநகர காவல்துறை ஆணையாளராக உயர் அதிகாரிகள் துடியாகத் துடிப்பதற்கு இது ஒரு முக்கிய காரணம். அரசு ஊழியர்கள், அதிகாரிகளே இப்படி இருக்கையில் மாட்சிமை தாங்கிய நீதிபதிகள் என்ன ஆவார்கள் என்பதை யோசித்துப் பாருங்கள். வேலைக்கு அலுவலக உதவியாளர்கள் மட்டும் 14 பேர். சிகப்பு விளக்கு பொறுத்திய வாகனம், இலவச மின் கட்டணம், தண்ணீர், இதர தளவாடங்கள். பார்ப்பவர்கள் அனைவரும், “லார்ட் ஷிப்” என்று அழைப்பது. நீதிமன்றத்தில் நடந்து செல்லும்போது அவர்களுக்கு முன்னால் உஸ்ஸு உஸ்ஸூ என்று வெள்ளித் தடியோடு ஓசையெழுப்பிச் செல்வது இவையெல்லாம் நீதிபதிகளை அடிமையாக்கி வைத்துள்ளது.

இந்த காரணத்தினால்தான், அத்தனை நீதிபதிகளும், எப்படியாவது ஓய்வு பெற்ற பின் ஏதாவது ஒரு ஆணையத்தின் தலைவராக வேண்டும் என்று துடியாகத் துடிக்கிறார்கள். ஓய்வு பெறப் போகிறோம் என்ற எண்ணமே அவர்களின் கைகளை நடுங்கச் செய்கிறது. ஓய்வு பெறும் ஆண்டின் தொடக்கம் முதலாகவே தங்களது லாபிகளை தொடங்குகிறார்கள்.

மீண்டும் ஏதாவது ஒரு தீர்ப்பாயத்தின் தலைவராகவோ, உறுப்பினராகவோ நியமிக்கப்பட்டால், மீண்டும் சிகப்பு விளக்கு, பணியாளர்கள் அனைத்தும் இரண்டு ஆண்டுகளுக்குக் கிடைக்கும்.

“This clamour for post retirement jobs is adversely affecting impartiality of the judiciary of the country and time has come that it should come to an end,” இரண்டு வருடங்களுக்கு முன்பாக பிஜேபியின் ஒரு கூட்டத்தில் பேசிய அருண் ஜேட்லி இவ்வாறு கூறினார். அவர் சட்ட அமைச்சராக இருந்தபோது, ஓய்வு பெறும் வயதை நெருங்குகையில், எங்கே தங்களது பயோ டேட்டாவை அளித்து விடப் போகிறார்களோ என்ற அச்சம் தனக்கு எப்போதும் இருந்தது என்று கூறுகிறார்.

ஒரு நீதிபதியாக எப்படியெல்லாம் நடந்து கொள்ளக் கூடாதோ, அப்படியெல்லாம் நடந்து கொண்ட தலைமை நீதிபதி சதாசிவம், வெளிப்படையாகவே தனது விருப்பத்தை ஓய்வு பெறும் நாளன்று தெரிவித்தார். பிடிஐ செய்தி நிறுவனத்துக்கு அளித்த பேட்டியில் “ஏகமனதாக தன்னை லோக்பால் அமைப்பின் தலைவராக தேர்ந்தெடுத்தால், அதை கண்டிப்பாக ஏற்றுக் கொள்வதாக கூறினார்”. ராஜீவ் கொலை வழக்கில் தண்டிக்கப்பட்டவர்களை விடுதலை செய்வது தொடர்பான வழக்கில் நீதிபதி சதாசிவம் ஐந்து நீதிபதிகள் கொண்ட அமர்வுக்கு மாற்றியதில், அவரது லோக்பால் கனவும் இருக்கிறது என்றே வழக்கறிஞர்கள் வட்டாரத்தில் பேசுகிறார்கள். காங்கிரஸ் கட்சி, நீதிபதி சதாசிவத்தை எப்படியாவது லோக்பால் அமைப்பின் முதல் தலைவராக நியமிக்கலாம் என்று முயற்சி செய்ததது. ஆனால் பிஜேபி கட்சியினர் தேர்தல் ஆணையரை சந்தித்து, இந்த முயற்சிக்கு எதிராக புகார் மனு அளித்த காரணத்தால், அந்த முடிவு அப்படியே நிறுத்தப்பட்டுள்ளது.

ஏப்ரல் 25ம் தேதிக்குள் ராஜீவ் கொலை வழக்கு குற்றவாளிகள் தண்டனை குறைப்பு தொடர்பாக தீர்ப்பு வழங்கப்படும் என்று கூறி விட்டு, அரசியல் சாசன அமர்வுக்கு வழக்கை தள்ளி விட்ட நீதிபதி சதாசிவத்தின் செயல் இயல்பான செயல் அல்ல.

“அரசியல் சாசன நீதிஇருக்கை மட்டுமே இதனை முடிவு செய்ய இயலும் என்கிற பட்சத்தில் இத்தனை நாள்களாக உச்சநீதிமன்றம் இந்த வழக்கை தன்வசம் வைத்திருந்திருக்கத் தேவையில்லை. அப்போதே இதனை அரசியல் சாசன நீதிஇருக்கையின் விசாரணைக்கு மாற்றியிருக்கலாம். இந்த வழக்கு இன்னும் விரைவுபட்டிருக்கும்.

உச்சநீதிமன்றம் அரசியல் சாசன நீதி இருக்கையிடம் விளக்கம் கோரியிருக்கும் முதல் கேள்வி: ஒரு வழக்கில் ஏற்கெனவே தண்டனைக் குறைப்புப் பெற்றவர், மறுபடியும் தண்டனைக் குறைப்புப் பெற முடியுமா? என்பதுதான். இதே கேள்வியை சில ஆண்டுகளுக்கு முன்பு சுப்ரமணியன் சுவாமியும் எழுப்பினார். தூக்குதண்டனையிலிருந்து ஆயுள் தண்டனையாக குறைக்கப்பட்ட நளினிக்கு இரண்டாம் முறையாக சலுகை, அல்லது தண்டனை குறைப்புக்கு சட்டத்தில் இடமில்லை என்று உச்சநீதிமன்றத்தில் அவர் மனு தாக்கல் செய்திருந்தார். அப்போதே இது தொடர்பாக உச்சநீதிமன்றம் அரசியல் சாசன நீதிஇருக்கை மூலம் தெளிவுபடுத்தியிருந்தால், இன்று இந்தப் பிரச்னையே எழுந்திருக்காது.” என்ற தினமணி தலையங்கம் எழுப்பும் கேள்வி, சதாசிவத்தின் நேர்மையையும் கேள்விக்குள்ளாக்குகிறது.

இதன் நடுவே, லோக்பால் அமைப்புக்கு தலைவரையும் உறுப்பினர்களையும் நியமிப்பதை எதிர்த்து, உச்சநீதிமன்றத்தில் ஒரு பொது நல வழக்கு விசாரிக்கப்பட்டு வருகிறது. அந்த வழக்கை தற்போதைய தலைமை நீதிபதி ஆர்.எம்.லோதா தலைமையிலான அமர்வு விசாரித்து வருகிறது. இணைப்பு அந்த வழக்கு நிலுவையில் இருக்கையில்தான், நீதிபதி சதாசிவம், லோக்பால் தலைவராக நியமித்தால், அதை ஏற்றுக் கொள்வேன் என பேட்டியளித்துள்ளார். லோக்பால் தலைவரை நியமிப்பது தொடர்பாக, இவர் தலைமை நீதிபதியாக இருந்த அதே நீதிமன்றத்தில் விசாரணை நடக்கையிலேயே, வெளிப்படையாக தனது பேராசையை வெளிப்படுத்தியுள்ளார். இவர் எந்த அளவுக்கு போதைக்கு அடிமையாகி இருக்கிறார் என்பதை உங்கள் முடிவுக்கே விட்டு விடுகிறேன்.

நீதிபதி சதாசிவம் மட்டும் அல்ல. சென்னை உயர்நீதிமன்றத்தில் இருந்து ஓய்வு பெறும் அத்தனை நீதிபதிகளும், இது போன்ற பதவிகளுக்காக அலையவே செய்கிறார்கள். பசுமைத் தீர்ப்பாய நீதிபதியாக இருக்கும் சொக்கலிங்கம் இந்த பதவிக்காக பெரிய அளவில் லாபி செய்தார்.

ஓய்வு பெற்ற பிறகு தீர்ப்பாயம், மனித உரிமை ஆணையம் போன்ற பதவிகளின் நியமனங்களை செய்யும் அதிகாரம் அரசுகளிடமே உள்ளது. இதனால், ஒய்வு பெற உள்ள அந்த ஒரு ஆண்டுக்குள், அரசுக்கு எதிராக எந்த தீர்ப்பையும் இந்த நீதிபதிகள் அளிப்பதில்லை. அதோடு மட்டுமல்லாமல், தங்களை தீர்ப்பாயத்துக்கு நியமனம் செய்வதற்காக, ஆளும் அரசுக்கு ஆதரவாக பல்வேறு தீர்ப்புகளை அளிக்கிறார்கள்.

சென்னை உயர்நீதிமன்ற நீதிபதியாக இருந்தவர் ஜோதிமணி. அவர் முன்னிலையில் கூடங்குளம் மற்றும் கல்ப்பாக்கம் அணு உலைகள் தொடர்பான வழக்கு நீதிபதி ஜோதிமணியால் விசாரிக்கப்பட்டு வந்தது. அந்த வழக்கில் மத்திய அரசின் சுற்றுச் சூழல் அமைச்சகம் ஒரு மனுதாரர். அந்த வழக்கு ஏறக்குறைய ஒரு மாதமாக ஜோதிமணி முன்னிலையில் தினந்தோறும் விசாரிக்கப்பட்டு வந்தது. அந்த மனு விசாரணையில் இருக்கும்போதே, நீதிபதி ஜோதிமணி, மத்திய சுற்றுச் சூழல் அமைச்சகத்துக்கு தன்னை பசுமைத் தீர்ப்பாய நீதிபதியாக நியமிக்குமாறு விண்ணப்பம் அளிக்கிறார்.

நீதிபதி ஜோதிமணி

இவர் எப்படிப்பட்ட நீதிபதி என்பதை புரிந்து கொள்ளுங்கள். தான் விசாரிக்கும் வழக்கில் ஒரு மனுதாரராக உள்ளவரிடமே, என்னை நீதிபதியாக நியமிக்க வேண்டி விண்ணப்பம் அளிக்கும் நபர் வழங்கிய தீர்ப்பு எப்படிப்பட்ட தீர்ப்பாக இருக்கும் என்பதை சொல்லவும் வேண்டுமா ? கூடங்குளம் அணு உலையைப் போல பாதுகாப்பான அணு உலை உலகிலேயே இல்லை என்று தீர்ப்பளித்தார் ஜோதிமணி.

மனுதாரராக இருக்கும் ஒருவரிடம் வழக்கு நிலுவையில் இருக்கும்போதே விண்ணப்பித்து, அதன் மூலமாக பெற்ற பதவியை ரத்து செய்ய வேண்டும் என்று சென்னை உயர்நீதிமன்றத்தில் ஒரு பொது நல வழக்கு தாக்கல் செய்யப்பட்டது. அந்த வழக்கை தள்ளுபடி செய்த நீதிபதிகள் சொன்ன காரணம் என்ன தெரியுமா ? பசுமைத் தீர்ப்பாயத்தின் தலைமையகம், டெல்லியில் இருக்கிறது, ஆகையால் இந்த வழக்கை டெல்லியில் தாக்கல் செய்யுங்கள் என்பதே.

ஜோதிமணி மட்டும் அல்ல. பெரும்பாலான நீதிபதிகள் தங்கள் ஓய்வு நாள் நெருங்க, நெருங்க, அடுத்த பதவிக்காக எவ்வித சமரசத்துக்கும் தயாராகவே இருக்கிறார்கள். இது போன்ற நீதிபதிகள் ஓய்வு பெறும் நேரத்தில் வழங்கும் தீர்ப்புகளை மிக மிக கவனமாக ஆராய வேண்டியுள்ளது.

ஓய்வு பெற்ற பிறகு, எனக்கு எந்த பதவியும் வேண்டாம் என்று மறுக்கும் நீதிபதிகள் அத்திப்பூத்தார்ப் போலவே இருக்கிறார்கள். சென்னை உயர்நீதிமன்றத்தில் சமீக காலங்களில் ஓய்வு பெற்ற பிறகு பதவி வேண்டாம் என்று கூறிய நீதிபதிகள், நீதிபதி சந்துரு, நீதிபதி சுகுணா மற்றும் நீதிபதி சித்ரா வெங்கட்ராமன்.

நீதிபதி சுகுணா

நீதிபதி சித்ரா வெங்கட்ராமன்

நீதிபதி சந்துருவுக்கு, தகவல் தொழில்நுட்பத் தீர்ப்பாயத்தின் உறுப்பினர் பதவியை வழங்குகிறோம் என்று கூறியபோது அதை மறுத்தார். நீதிபதி சித்ரா வெங்கட்ராமனுக்கோ, இதை விட வளமையான பதவி வழங்கப்பட்டது. கம்பெனிகள் லா போர்டின் உறுப்பினர் பதவி வழங்குகிறேன் என்று தற்போதைய தலைமை நீதிபதி கூறியபோது, வேண்டாம் என்று மறுத்தார். தற்போதைய தலைமை நீதிபதி, நான் ஒரு வாரம் விடுப்பில் செல்லுகிறேன், அந்த ஒரு வாரத்துக்கு நீங்கள் பொறுப்பு தலைமை நீதிபதியாக இருங்கள். ஒவ்வொரு நீதிபதிக்கும் தலைமை நீதிபதியாக இருக்க வேண்டும் என்று ஆவல் இருக்கும் என்று கூறியபோது அதையும் மறுத்தார் நீதிபதி சித்ரா வெங்கட்ராமன்.

நீதிபதி சுகுணாவிடம் உங்களுக்கு என்ன பதவி வேண்டும் என்று கேட்டபோது, அவரும் எந்தப் பதவியும் வேண்டாம் என்று மறுத்து விட்டார்.

இப்படிப்பட்ட நீதிபதிகளும் இருக்கத்தான் செய்கிறார்கள். ஆனால், நீதிபதி சதாசிவம் நீதிபதி ஜோதிமணி போலவும் நீதிபதிகள் இருக்கத்தான் செய்கிறார்கள்.

இந்நாட்டின் ஜனநாயகத்தை பாதுகாத்து, சட்டத்தின் ஆட்சியை நிலை நிறுத்த வேண்டிய மாட்சிமை தாங்கிய நீதிபதிகள், அதிகாரம் என்ற போதையின் பிடியில் சிக்கியுள்ளதால், தள்ளாடுவது அவர்கள் மட்டுமல்ல, நீதியின் ஆட்சியும்தான்.