திருமாவிற்குத் திறந்த மடல்

அன்பு நண்பரே,

புதிதாகச் சொல்ல என்னிடம் ஏதும் இல்லைதான். ஆனால் முக்கிய நிகழ்வுகள்போது ஏதாவது சொல்லாவிட்டால் என்ன செய்தியாளன் நான் ! எனவே மீண்டும் ஊதிவைக்கிறேன்.
திமுக கூட்டணியிலிருந்து விலகிவிடலாம் என நீங்கள் சிந்திப்பதாக செய்தி உலா வருகிறது. எவ்வளவு உண்மை அது எனத் தெரியவில்லை. உண்மையாக இருக்கவேண்டும் என விரும்புகிறேன்.

திமுகவுடன் கூட்டணி அமைத்ததற்காக நீங்கள் கொடுத்த விலை அதிகம். ரொம்பவே அதிகம். உங்கள் இயக்க ஒழுக்க மதிப்பீடுகள், இலக்குக்கள் அனைத்துமே ஒரேயடியாக சரிந்ததற்கு தேர்தல் அரசியல், குறிப்பாக முற்றிலுமாக சீரழிந்துவிட்ட திமுகவுடனான உறவுதான் காரணம் என உறுதியாகச் சொல்லமுடியும். நாம் யாருடன் பழகுகிறோமோ அவர்களின் அனைத்து தீய குணங்களும் நம்மிடம் எளிதில் ஒட்டிக்கொண்டுவிடுகின்றன.

அஇஅதிமுகவுடன் இருந்தால் மட்டும் வாழ்ந்திருக்குமா, அடிப்படையில் சீரழிவதற்கானக் கூறுகள் உங்களிடம் இல்லாவிடில் இப்படியெல்லாம் ஆகியிருக்குமா என்ற கேள்விகளும் எழாமல் இல்லை.

அம்மாவுடன் இருந்திருந்தால் அது அதிகம் உங்களை பாதித்திருக்காது. காரணம் நெருங்கவே விடமாட்டார். எல்லோரும் எண்சாண் உடம்பை ஒரு சாணாகக் குறுக்கி தரையில் விழுந்து வணங்கும் குடிபடைகளே, ஓபிஎஸ்சே…சில நாட்களில் உங்களுக்கு நிச்சயம் வெறுத்துப்போயிருக்கும். சரி அடிப்படையில் உங்கள் சிந்தனைகள்தான், இலட்சியங்கள்தான் எப்படி? அவற்றை நம்பியே இம்மடலை எழுதுகிறேன்.

நண்பன் மலைச்சாமிக்குப் பிறகு தீவிரமாகவே குரல் கொடுத்து, சில வேளைகளில் வரம்புமீறியே ஆதிக்க சாதியினருக்கெதிராக்க் குரல் கொடுத்து ஒடுக்கப்பட்ட/இன்னமும் ஒடுக்கப்படும் பறையரின இளைஞர்களுக்கு புத்துணர்ச்சி அளித்து, ஒருங்கிணைக்க முயன்றீர்கள்.
1998 தேர்தல்கள்போது நீங்கள் சிதம்பரத்தில் போட்டியிடுகிறீர்கள். அப்போது உங்கள் தேர்தல் அலுவலகத்தில் இளைஞர்கள் ததும்பி வழிந்தனர். நிற்பதற்குக் கூட இடமில்லை. அந்நிலையிலேயே அவர்களிடம் பேட்டி எடுத்தேன். அவர்களது கட்டுக்கடங்கா உற்சாகம் என்னையும் உடனிருந்த மதுரை இராஜனையும் தொற்றிக்கொண்டது. ஆஹா தமிழக தலித் வரலாற்றில் புதிய திருப்பமெனவே நாங்கள் மகிழ்ந்தோம்.

அந்த நேரத்தில் உங்களையும் புதிய தமிழகம் கிருஷ்ணசாமியையும் ஒப்பிட்டு கட்டுரை எழுதினேன். ஏழு தொகுதிகளில் திமுக-தமாகா மண்ணைக் கவ்வக் காரணமாயிருந்து அந்த நேரத்தில் இந்தியாவையே திரும்பிப் பார்க்கவைத்தவர் கிருஷ்ணசாமிதான். அவருக்கு நான் அப்போது சற்று நெருக்கமென்றாலுங்கூட தொண்டர்களுடன் மிக இனிமையாக, சகஜமாகப் பழகுவது நீங்கள் என்பதால் உங்கள் மீது சற்று கூடுதல் அன்பும் மரியாதையும்.

தேர்தல்களுக்குப் பிறகு தனக்குக் கிடைத்த கவனத்தில் தன்னையே மறந்தார் டாக்டர். ஏதோ தமிழகத்தின் தலைவிதியைத் தான் நிர்ணயிக்கப்போவது போலவே நடந்துகொண்டார். இரு அமைப்புக்களும் கைகோர்க்கவேண்டும் என்று சொன்னபோது அனைத்து தலித் பிரிவினருக்கும் தானே தலைவர் என்பதுபோல, தரையில் கால் பாவாது மிதந்தார். எதையும் காதில் போட்டுக்கொள்ளவில்லை. தான் சார்ந்திருக்கும் உட் பிரிவினரின் எண்ணிக்கை எத்தனை, எத்தனை தொகுதிகளில் எத்தனை சதவீதம் என்பதெல்லாம் அந்நேரத்தில் அவருக்குப் புரியவில்லை.

1999ல் மூப்பனாருக்கு எப்படியெல்லாம் சிக்கல்கள் ஏற்படுத்தினார்? அதன் பிறகு மெல்ல மெல்ல உண்மையினை உணரத்தொடங்கினார். ஆனால் காலம் கடந்திருந்தது, நீங்கள் வளர்ந்து வந்த நேரத்தில் உங்களுடன் இணக்கமானதொரு உறவை ஏற்படுத்திக்கொண்டிருந்தால் அது அவருக்கும் சரி, பொதுவாக தலித்துக்களுக்கும் சரி, நலம் பயந்திருக்கும்.

அதன் பிறகே உங்கள் இயக்கம் அசுர வளர்ச்சியடைந்த்து. இடையில் உங்களுக்கும் இராமதாசுக்கும் நல்லுறவு ஏற்பட்டது. இளையபெருமாளுடன் ஏற்படுத்திக்கொண்ட ஒப்பந்தம் ஒன்றும் சமூக உதவிக்கு பெரிதாக உதவவில்லை. ஆயினும் மருத்துவருக்கு அடிப்படையில் தலித் வன்னியர் ஒற்றுமையில் அக்கறை இருப்பதாகவே தோன்றியது. குடிதாங்கியில் அவரது நிலைப்பாடு கண்டு மகிழ்ந்து தமிழ்க்குடிதாங்கி என நீங்கள் அவருக்கு பட்டமளித்தது மிகையே என்றாலும், அது சரியான அணுகுமுறையாகப் பார்க்கப்பட்டது.

ஆனால் பின்னர் நீங்கள் பாஜகவுடனும் கூட்டணி சேர்ந்தீர்கள். அதைவிடவும் சரிவு இருந்திருக்கமுடியாது. பின்னர் திடீரென தமிழ்த் தேசியப் பிரச்சினையைக் கையிலெடுத்தீர்கள். இராமதாசுடன் மீண்டும் கூட்டணி ஏற்படுத்தியபோது அது தமிழினவாதத்தினை மையப்படுத்தியே அமைந்தது, தலித் நிலையினை அல்ல.
இராமதாசின் உள்நோக்கம் என்ன என்பது இப்போது பளிச்செனத் தெரிகிறது. அம்பேத்கர், மார்க்ஸ் படங்களைப் போட்டுக்கொண்டாலும் அவர் அடிப்படையில் சாதி அரசியல் செய்யவே விரும்புகிறார். கன்ஷிராம் போல மிகப்பிற்படுத்தப்பட்டவர்களையெல்லாம் ஒன்றிணைத்து முதல்வராகலாம் எனக் கனவு கண்டார். ஆனால் அவரது சுயரூபம் அம்பலமானவுடன் பாருங்கள், சாதிவெறியராகிவிட்டார் வன்னியர் நலனே தன் நோக்கமென்கிறார், முந்தைய தமிழ்த் தேசியமெல்லாம் பின்னுக்குத் தள்ளப்பட்டுவிட்டது. அவருடன் தமிழ்த் தேசியத்தை முன்னெடுக்க கைகோர்த்தீர்கள், நேரம் வந்தபோது கழற்றிவிட்டார்.

இராமதாசுடன் ஒரு பொதுக்கூட்டத்தில்

அது போகட்டும் நீங்கள் தமிழ்த் தேசிய அணியில் ஏன் இணைந்தீர்கள், எனக்கு விளங்கவே இல்லை. பெரியாரே ஆதிதிராவிடர்கள் தமிழர்கள் இல்ல என்ற ரீதியில்தானே பேசினார்: திராவிடனே அல்லது தமிழனே, அதாவது பார்ப்பானல்லாத, முஸ்லீம் அல்லாத, கிறிஸ்துவனல்லாத, ஆதி திராவிடன் (ஷெட்யூல்ட் வகுப்பார்) அல்லாத, திராவிடனே, சூத்திரனே எனத் தெளிவாகவே வரையறுத்திருக்கிறார். அரசியலமைப்புச் சட்டத்தில் தலித்துக்களுக்கு இட ஒதுக்கீடு என்றபோது எங்களுக்கில்லையே என்றார். விடுதலைக்குப் பிறகு, குறிப்பாக 1967ஆம் ஆண்டில் காங்கிரஸ் தோற்கடிக்கப்பட்ட பிறகு, தொடர்ந்து இடைநிலை சாதியினர் அனைத்து தளங்களிலும் தங்கள் பிடியினை வலுப்படுத்திக்கொண்டே வந்தனர். திமுகவின் மாவட்ட செயலாளர்களெல்லாம் எத் தட்டிலிருந்து வந்தனர்? எல்லாவற்றையும் பார்த்துக்கொண்டுதானே இருந்தார் பெரியார். கீழவெண்மணி பற்றிக்கூட பார்ப்பனர் இராம்மூர்த்தியின் சதி என்றல்லவா அலட்சியப்படுத்தினார்.

அவர் தலித் விடுதலை பற்றி தொடர்ந்து வலியுறுத்தி வந்திருக்கிறார் என்பது உண்மை. ஆனால் பிராமணரல்லாதார் ஒற்றுமை வலுப்பெறவேண்டி தலித் நலனைப் புறக்கணித்தார் என்பதும் உண்மைதானே.

ஆசானே அப்படியென்றால் சீடர்கள் எப்படியிருப்பார்கள்? அவருக்கிருந்த பரந்த மனப்பான்மை, சமூக அக்கறையில், 20 சதம் கூட அவர்களுக்கில்லை. அந்நிலையில் திராவிட அரசியல் தமிழ்ச் சமூகத்தை அங்கிங்கெனாதபடி ஆக்கிரமித்திருக்கும் நிலையில், எப்படி, எத் தளத்தில் தலித்துக்களுக்கு இடம் கிடைக்கும் என நீங்கள் எதிர்பார்க்கமுடியும்?

ஈழத்திலேயே தலித் மக்களுக்கிழைக்கப்பட்ட கொடுமைகள் பற்றி தொடர்ந்து ரவிகுமார் சுட்டிக்காட்டியிருக்கிறார். அது குறித்து எந்த்த் தமிழியக்கம் வாய் திறந்து பேசியது? தமிழ்நாட்டில் தொடர்ந்து தலித்துக்களின் உரிமைகள் மறுக்கப்பட்டு வருகின்றனவே, எந்தத் தமிழியக்கம் கண்டனம் தெரிவித்தது?

பிரபாகரன் வாழ்க என்றால் புலம்பெயர்ந்த தமிழர்களின் ஆதரவு பல வடிவங்களில் கிடைக்கும் என்பதாலும், தமிழியக்கங்களுடன் கைகோர்ப்பதால் ஓரளவேனும் இடைநிலை சாதியினரின் அங்கீகாரம் கிடைக்கக்கூடும் என்பதாலும் நீங்கள் அத் திசையில் பயணித்திருக்கலாம். ஆனால் அதனால் உங்கள் மக்களுக்கு எப்பயனும் ஏற்பட்டுவிடவில்லை என்பதுதான் கசப்பான உண்மை. தர்மபுரி கொடுமைகள் போது கூட எக்கட்சி பெரிய அளவில் ஆர்ப்பாட்டத்தில் இறங்கியது? உங்களைத் தவிக்கத்தானே விட்டனர்.
நீங்கள் அத்தகையோர் பின் சென்றதன் விளைவு தலித் மக்களின் நேரடியான, உடனடியான பிரச்சினைகளில் போதிய கவனம் செலுத்தமுடியவில்லை. பிரபாகரன் தொடர்பில் எத்தனை ஆர்ப்பாட்டங்கள்…ஆனால் கடந்த 15 ஆண்டுகளில் தீண்டாமை தொடர்பில் என்ன போராட்டம் நீங்கள் நடத்தினீர்கள்? சிந்தித்துப் பாருங்கள். 90களில் நீங்கள் காட்டிய வேகம் இப்போது எங்கே போயிற்று? வடுகபட்டியிலிருந்து தர்மபுரிவரை அவலங்கள் தொடர்கின்றன. இரட்டைக் குவளை, தனி மயானம், பள்ளிகளிலேயே தலித் மாணவர்கள், சத்துணவு அமைப்பாளர்கள் புறக்கணிப்பு, சாதித்தூய்மை கெடுகிறதெனச் சொல்லி ஒவ்வொரு பகுதியிலும் இடைநிலை மேல்நிலை சாதியினர் தலித் மக்கள் மீது போர் தொடுக்கின்றனர். அதை எதிர்த்து எந்த விதமான முயற்சிகள் உங்களால் மேற்கொள்ளப்பட்டன? நீங்கள் சளைக்காமல் கொண்டாடிவந்த முத்தமிழறிஞர் அல்லது வீரமணியார் என்னவித உதவியை நல்கினர்?

இப்போது நீங்கள் திமுக கூட்டணியைவிட்டு விலகாவிட்டாலும் அவர்களாகவே உங்களை செட்டை விட்டு விலக்கிவிடுவர் என்று கருதப்படுகிறது. தேர்தல் தோல்வி குறித்து ஆராயவென கூட்டப்பட்ட திமுக பொதுக்குழுவில் ஏறத்தாழ அனைவருமே தலித் மற்றும் முஸ்லீம் அமைப்புக்களுடனான கூட்டணி பரவலாக மேல் மற்றும் இடைநிலை சாதியினர் மத்தியில் கடும் அதிருப்தியை உருவாக்கியதாகக் கூறியிருக்கின்றனர்.

திமுக தலைவர்களுடன் திருமா

கலைஞரே ஓர் ஏமாற்றுப்பேர்வழி. வேடதாரி. ஆனால் வேடம்போடவேண்டிய அவசியம் அவருக்கிருக்கிறது, நான் தலித்துக்களின் சம்பந்தி என்று ஜம்பம் பேசவேண்டும் என்ற உந்துதல் இருக்கிறது. அவரது வாரிசுக்கோ அப்படியான கவலைகள் எதுவுமே இல்லை. எல்லாவற்றையும் துடைத்துப்போட்டவர், எதையும் அறியாதவர் கூட.

ஸ்டாலினுக்கு அரசியல் என்பது பணம் பண்ணும் ஒரு வழி அவ்வளவே. அவரது வாரிசாக உதயநிதி பார்க்கப்படுகிறார். கட்சி விளங்கும் என்பதற்கப்பால், அவர்களிலெவருக்குமே தலித் மேம்பாட்டில் சிறிதளவு அக்கறையும் கிடையாது. அந்நிலையில் அடுத்த சட்டமன்றத் தேர்தல்களில் உங்களுக்கோ முஸ்லீம் அமைப்புக்களுக்கோ இடமளிப்பதில்லை என முடிவெடுத்துவிட்ட செய்தி உங்களுக்கு வந்த நிலையில்தான், இப்போது வேறு வழியின்றி நீங்களாகவே வெளியேறுவதுபோல காண்பித்துக்கொள்கிறீர்கள் என்கின்றனர்.

எப்படியாயினும் இம்முடிவு மனமார வரவேற்கத் தகுந்த்தே. பாதை தவறிவிட்டீர்கள். மீண்டும் தலித் நலனை மட்டும் முன்னிறுத்தி போராட்டங்களில் இறங்குங்கள். அப்போதும் உங்களுக்கு மற்ற கட்சிகளின் ஆதரவு ஒன்றும் கிடைத்துவிடப்போவதில்லை. அதனால் என்ன, சமரசமற்றுப் போராடுங்கள்.
கற்பியுங்கள். தற்போது கட்ட பஞ்சாயத்து எனக் கெட்ட பெயர் வாங்கியிருக்கும் உங்கள் தொண்டர்கள் உலகை அறிந்துகொள்ளச் செய்யுங்கள்.

எனக்கு நெருக்கமானவர்களுக்கு ஒரு சிக்கலான நேரத்தில் உங்கள் தோழர்களைத் தான் அணுகினேன்.. எவ்வித எதிர்பார்ப்பும் இல்லாமல், நட்பிற்காக தலையிட்டு, அந்த நேரத்து சிக்கலை சரிசெய்துகொடுத்தார்கள். ஆனால் பொதுவாக எப்படி அவர்கள் பார்க்கப்படுகின்றனர்?

குறிப்பிடத்தக்க அறிவுஜீவியும் விடுதலைச் சிறுத்தைகள் கட்சியின் முக்கிய தலைவர்களில் ஒருவருமான ரவிகுமார்

ரவிகுமார் போன்ற மெத்தப் படித்த அறிவுஜீவிகள் உங்கள் அருகிலேயே இருக்கும்போது உங்கள் மக்களின் பார்வை மேலும் விசாலமாக, அறிவு ஆழமாக ,ஆயிரம் செய்யமுடியுமே. ரவிகுமார் தன் சமூகத்திற்கு ஆற்றவேண்டிய கடமையினை இனிமேலாவது வேகமாக ஆற்றவேண்டும்.
நற்சான்றிதழ் வழங்குவது அல்லது அரசிடம் ஏதாவது ஆகவேண்டியிருந்தால் அதற்கு சிபாரிசு செய்வது மட்டும்தான் உங்கள் அமைப்பின் வேலையா என்ன?

உத்திரபிரதேசத்தில் என்னவாயிற்று? மாயாவதி சர்வஜன் அரசியல் என்றார். அமோக வெற்றியும் பெற்றார். பகுஜன்னை மறந்தார். ஊழல்வேறு செல்வாக்கு வீழ்ச்சி அடைந்தது. அப்புறம்தான் விழித்துக்கொண்டு தலித் மக்கள் பாதுகாப்பிற்கென சில முன்முயற்சிகள் எடுத்தார். ஆனாலும் தோல்வியே.

நடந்து முடிந்த நாடாளுமன்றத் தேர்தல்களிலோ ஓர் இடத்தில் கூட வெற்றிபெறமுடியவில்லை. தலித்துக்களிலேயே உட்பிரிவினர் சிலர் பாஜக பக்கம் சென்றுவிட்டனர்.

தலித் பிரிவினருக்கிடையே பூசல்/முரண்பாடுகள் எங்குமே ஓய்ந்ததாகத் தெரியவில்லை. இன்னமும் உங்கள் அமைப்பு பறையர் இன அமைப்பாகத் தான் இருக்கிறது. பள்ளரினத்தோருக்காவது புதிய தமிழகமிருக்கிறது, அவர்கள் பொருளாதார சமூக நிலை ஒப்பீட்டளவில் ஓரளவு திருப்திகரமாக இருக்கிறது, ஆனால் அருந்ததியர், துப்புரவுத் தொழிலாளர்கள் மிக பலவீனமாகத்தானே இருக்கின்றனர். அவர்களில் எவரும் உங்கள் பக்கம் வரவே இல்லையே. நான் அறிந்தவரை அம்மக்கள் பகுதிகளில் உங்களுக்கு அமைப்பு கூட இல்லை. இந்நிலை மாறவேண்டும்.

திருமா, களப் பிரச்சினை உங்களுக்குத் தான் தெரியும். வீட்டில் நாற்காலியில் அமர்ந்துகொண்டு வேதாந்தம் பேசுவது எளிது. ஆனால் என் ஆதங்கத்தை விரிவாகவே சொல்லிவிட்டேன். காலம் நல்ல தீர்வை அளிக்கட்டும்.

அன்புடன்
த.நா.கோபாலன்