வாழ்த்துக்கள் கேஜ்ரிவால்

ஆம் ஆத்மி கட்சியின் வெற்றி எதிர்ப்பார்த்த ஒன்றுதான். ஆனால் எதிர்ப்பார்க்காத ஒன்று, இத்தகைய மாபெரும் வெற்றி. மக்கள் இக்கட்சி மீதும், அதன் தலைவர் அர்விந்த் கேஜ்ரிவால் மீதும் வைத்துள்ள பெரும் நம்பிக்கையே இந்த வெற்றி உணர்த்துகிறது.

சாமான்ய வெற்றி அல்ல இது. மகத்தான வெற்றி.   ஊடகங்கள் ஆம் ஆத்மி கட்சியின் இந்த வெற்றியை சுனாமி என்று கூறுகின்றன. கிட்டத்தட்ட சுனாமி அடித்தது போலத்தான் இரு பெரும் தேசியக் கட்சிகளான காங்கிரஸ் மற்றும் பிஜேபியை ஆம் ஆத்மி கட்சி அடித்து துவம்சம் செய்துள்ளது.   இறுதிக்கட்ட நிலவரப்படி மொத்தம் உள்ள 70 தொகுதிகளில் 67 இடங்களை ஆம் ஆத்மி கைப்பற்றும் நிலைமை ஏற்பட்டுள்ளது.

ஆம் ஆத்மி கட்சித் தலைவர்களே எதிர்பபாராத அளவில் மிகப் பிரம்மாண்டமான வெற்றி இது.

பல்வேறு வகைகளில் இந்தத் தேர்தல் வரலாற்று சிறப்பு மிக்கது.   இதற்கு முன்னதாக, கட்சி தொடங்கிய ஒரு சில வருடங்களிலேயே ஆட்சியைப் பிடித்த கட்சி ஆந்திரப் பிரதேசத்தில் தெலுங்கு தேசம் மட்டுமே என்று நினைவு.   ஆனால் தெலுங்கு தேசம் கட்சிக்கு, என்.டி.ராமாராவ் என்ற ஒரு மிகப்பெரிய நட்சத்திரத்தின் பலம் இருந்தது.   ராமாராவ் தேவுடு என்று ஆந்திர மக்களால் தொழப்பட்டவர்.   அதே போல எம்.ஜி.ஆரும்.   அவரும் தமிழக மக்களால் கடவுளாகவே வழிபடப்பட்டவர்.   ஆனால் ஆம் ஆத்மி கட்சிக்கு அது போன்ற நட்சத்திர பின்புலங்கள் துளியும் கிடையாது. ஒரு முன்னாள் அரசு அதிகாரி என்ற பிம்பத்தை வைத்து, இப்படி ஒரு மாபெரும் அலையை உருவாக்கியது எளிதானது அல்ல. மக்களி நாடித்துடிப்பை உணர்ந்து செயல்படும் ஒரு நபரால் மட்டுமே, இப்படி ஒரு அமைப்பை வழிநடத்தி வெற்றியை ஈட்ட முடியும்.

ஆம் ஆத்மியின் இந்த வெற்றி அவர்களின் அமைப்பு பலம், மற்றும் உத்திகளைத் தவிர்த்து, பிஜேபியின் நடவடிக்கைகள் காரணமாகவும் அமைந்தது. வானத்தை வில்லாக வளைத்துத் தருகிறோம் என்று பாராளுமன்றத் தேர்தல் பிரச்சாரத்தின்போது அளித்த வாக்குறுதிகளில் இருபது சதவிகிதத்தைக் கூட நிறைவேற்றாதது மட்டுமல்ல, தொடர்ந்து மக்கள் விரோத கொள்கைகளை செயல்படுத்தியதுமே.   மகாராஷ்டிரா, ஹரியாணா, காஷ்மீர் போன்ற மாநிலங்களில் மோடி என்ற பிம்பத்தை வைத்து தேர்தலை வென்றது போலவே, டெல்லி தேர்தலிலும் வெற்றி பெறலாம் என்று உறுதியாக நம்பியது அமீத் ஷா – மோடி கூட்டணி. தற்போது அமீத் ஷா மற்றும் மோடி ஆகிய இருவர் கூட்டணியே பிஜேபியில் அனைத் முடிவுகளையும் எடுத்து வருகிறது. இதன் காரணமாகவே டில்லியில் பல காலமாக பிஜேபியில் இந்த தலைவர்களையெல்லாம் புறந்தள்ளி விட்டு, கிரண் பேடியை முதல்வர் வேட்பாளராக அறிவித்தார்கள். இந்த தேர்தலில் பிஜேபி முழுக்க முழுக்க நம்பியது, மோடி என்ற பிம்பத்தை மட்டுமே. ஒரு புறம் ஆம் ஆத்மி கட்சி டெல்லியின் பிரச்சினைகளையும் அதைத் தீர்ப்பதற்கான யோசனைகளையும் வைத்து பிரச்சாரம் செய்து கொண்டிருக்க, பிஜேபியும் மோடியும், கேஜ்ரிவால் ஓடிப்போனவர், கேஜ்ரிவால் நக்சலைட், கேஜ்ரிவாலுக்கு ஆட்சி நடத்தத் தெரியாது என்று பிரச்சாரம் செய்து கொண்டிருந்தனர். ஒரு பிஜேபி தலைவர் கேஜ்ரிவாலை குரங்கு என்றார்.

டெல்லி தினசரிகளில் பிஜேபி சார்பாக வெளியிடப்பட்ட விளம்பரங்களில் கேஜ்ரிவாலின் மீது தரந்தாழ்ந்த தாக்குதல்கள் மேற்கொள்ளப்பட்டன. ஆனால் கேஜ்ரிவால் தரப்பினரோ, வெகு நிதானமாக, பக்குவப்பட்ட ஒரு அரசியல் கட்சி போல இத்தாக்குதல்களை எதிர்கொண்டனர். “என் எதிரிகள் என்னைப் பற்றி ஏராளமான பொய்களை கூறுகின்றனர். நான் அவர்களைப் பற்றி உண்மையை மட்டுமே சொல்லப்போகிறேன்” என்றார். இரண்டு கோடி ஊழல் பணத்தை நன்கொடையாக வாங்கி விட்டனர் என்று குற்றம் சாட்டினர் பிஜேபியினர் இவர்கள் நேர்மையின் மறுபக்கம் போல.   ஆனால், இவை எதுவுமே மக்களிடம் எடுபடவில்லை என்பதையே முடிவுகள் காட்டுகின்றன.

இந்தத் தேர்தல் மோடி அரசின் செயல்பாடுகள் குறித்து வைக்கப்பட்ட தேர்வா என்றால், அப்படி முழுமையாக எடுத்துக் கொள்ள முடியாவிட்டாலும், அதை முழுமையாக நிராகரிக்கவும் முடியாது. ஒவ்வொரு மாநில தேர்தலையும் மத்திய அரசின் மதிப்பீடாக கருத முடியாதுதான். ஆனால், இந்தத் தேர்தலை அப்படி கருதுவதற்கான சூழலை ஏற்படுத்தித்தந்தது பிஜேபியே.   டெல்லி தேர்தலுக்கு இரண்டு நாட்களுக்கு முன்பாக அனைத்து நாளிதழ்களிலும் வெளியான விளம்பரங்களில், மோடி அரசின் எட்டு மாத சாதனைகள் விளம்பரப்படுத்தப்பட்டு இருந்தன. டெல்லி சட்டசபைத் தேர்தலுக்கு பிரச்சாரம் செய்யச் சொன்னால், டெல்லி தேர்தலின் முடிவுகளை வைத்துத்தான் உலகம் இந்தியாவை எப்படிப்பட்ட நாடு என்பதை பார்க்கும் என்றார்.   என் அதிர்ஷ்டத்தால்தான் பெட்ரோல் விலை குறைந்தது என்றார்.   டெல்லி முழுக்க வைக்கப்பட்டிருந்த விளம்பரப்பலகைகள், மோடியோடு பயணியுங்கள் என்றே பிரகடனப்படுத்தின. இந்த தேர்தலை மோடி அரசின் மீதான மதிப்பீடு என்று மாற்றியதே பிஜேபிதான். ஆனால், தோல்விக்குப் பிறகு, இது ஒரு பெரிய முனிசிபல் கார்ப்பரேஷனின் தேர்தல் என்று மழுப்புகிறார்கள்.

இந்த வகையில் மோடி அலை என்ற மாயையை முதன் முதலாக உடைத்த வகையில் இது ஒரு வரலாற்றுச் சிறப்பு மிக்க வெற்றி.

அடுத்ததாக, இந்திய ஜனநாகயத்தின் தேர்தல் அரசியலை கூர்ந்து நோக்கியவர்களுக்கு நன்றாக தெரிந்த ஒரு விஷயம், கருப்புப் பணம் இல்லையென்றால், இந்தியாவில் தேர்தலில் வெற்றி பெறுவது என்பது நடக்காத காரியம். தமிழகத்தைப் பொறுத்தவரை, ஒரு கவுன்சிலர் தேர்தலுக்கே ஒரு கோடி ரூபாய் தேவைப்படும் ஒரு சூழலில் வாழ்கிறோம். இப்படிப்பட்ட ஒரு சூழலில், எவ்விதமான நட்சத்திர பலமோ, தொழில் அதிபர்களின் பின்புலமோ இல்லாத ஒரு கட்சியை உருவாக்கி, உலகெங்கும் உள்ள நல்ல உள்ளங்கள் அளித்த நிதி உதவியால் ஒரு வெளிப்படையான நிதியை திரட்டி, இத்தேர்தலை சந்தித்ததே ஒரு மிகப்பெரிய சாதனை என்றால், இரண்டு பெரிய தேசிய கட்சிகளை இருந்த இடம் தெரியாமல் டெல்லி தேர்தலில் அழித்தது ஒரு மாபெரும் சாதனை.

இருபதுகளில் கட்சியைத் தொடங்கி இரண்டு மாநிலங்களில் ஆட்சியை நடத்திய இடதுசாரிகளால், இந்த சாதனையை செய்ய இயலவில்லை என்பதை நாம் இந்த நேரத்தில் கவனத்தில் கொள்ள வேண்டும்.

ஆம் ஆத்மி கட்சி இந்தத் தேர்தலில் பயன்படுத்திய உத்திகள் அனைத்து அமைப்புகளும் கவனத்தில் கொள்ள வேண்டியது.   எந்த சமூக வலைத்தளங்களை பயன்படுத்தி பிஜேபி ஒரு மிகப்பெரிய அலை போன்ற பிம்பத்தை ஏற்படுத்தியதோ, அதே அலையை ஆம் ஆத்மி கட்சி அதே சமூக வலைத்தளங்களை பயன்படுத்தி ஏற்படுத்தியது.   பிஜேபிக்கு இருப்பது போன்ற ஆர்எஸ்எஸ் அமைப்பு பலம் ஆம் ஆத்மிக்கு கிடையாது. ஆனால் இந்த சமூக வலைத்தளங்களால் நாடெங்கும் இருந்த தொண்டர்களை ஆம் ஆத்மி கட்சியால் இணைக்க முடிந்தது.   சமீபத்தில் டெல்லி சென்றிருந்தபோது, இந்தியா முழுக்கவிருந்து ஆம் ஆத்மி கட்சிக்காக தொண்டர்கள் தங்கள் சொந்தப் பணத்தை செலவழித்து, தங்கியிருந்து, டெல்லி மெட்ரோவில் பல்வேறு இடங்களுக்கு பயணித்து பிரச்சாரத்தில் ஈடுபட்டிருந்ததைக் காண முடிந்தது. இது ஒரு மிகப்பெரிய மாற்றம்.   அரசியல் கூட்டங்களுக்கு தொண்டர்களை கூட்டுவதே மிகப்பெரிய சிரமமாக மாறிவிட்ட ஒரு சூழலில், தங்கள் சொந்தப் பணத்தை செலவழித்து வரும் தன்னார்வத் தொண்டர்களை தன்னிடத்தே ஆம் ஆத்மி கட்சி வைத்திருப்பது, அதன் மிகப்பெரிய பலமாக அமைந்தது.

ஆம் ஆத்மி கட்சி இது வரை எந்த அரசியல் கட்சியும் செய்யாத ஒரு புதிய உத்தியை கடைபிடித்தது.   அதாவது எந்தவிதமான வரையறுக்கப்பட்ட கொள்கைகளும் கிடையாது.   வெளிப்படையாக முதலாளித்துவ கொள்கைகளையும் கடைபிடிப்பது கிடையாது.   நேரடியான கம்யூனிச சித்தாந்தத்தைப் பின்பற்றுவதும் கிடையாது.   இரண்டையும் சமமாக பாவித்து, வெகுஜன மக்களின் நன்மைக்கு ஏற்றார்ப்போல கொள்கைகளை வகுப்போம் என்று எடுத்த முடிவு. இத்தகைய ஒரு முடிவை எளிதாக ஒரு வழுக்கல் கொள்கை என்று உதாசீனப்படுத்திவிட முடியும். ஆனால், இடதுசாரி கொள்கைகளில் நம்பிக்கை உடையவர்கள், முதலாளித்துவமே சிறந்தது என்று வாதிடுபவர்கள் ஆகிய இருவரையும் ஒரு புள்ளியில் இணைக்கும் வசதியான ஒரு நிலைபாடு இது.   பாட்டாளிவர்க்க சர்வாதிகாரம் என்பதை இறுதி லட்சியம் என்று வெளிப்படையாக அறிவித்துள்ள இடதுசாரிகள் கூட, இந்த முதலாளித்துவப் பொருளாதார அமைப்புக்குள் எப்படி செயல்படுவது என்றே இன்று ஆராய்ந்து கொண்டிருக்கின்றனர்.   கம்யுனிச சீனாவே சந்தைப் பொருளாதாரத்தை தழுவியுள்ளது. இந்த நிலையில், முதலாளித்துவத்துக்கு எதிரானவர்கள் கிடையாது என்று அறிவித்த அதே நேரத்தில், கொள்ளை லாபம் அடிக்கும் நிறுவனங்களை கட்டுப்படுத்துவோம் என்றும் முடிவெடுத்துள்ளது, பரவலாக அனைத்துத் தரப்பு மக்களையும், ஆம் ஆத்மி கட்சிக்கு ஆதரவு தர வைத்துள்ளது.

ஆம் ஆத்மியின் வெற்றி வரலாற்றுச் சிறப்பு மிக்க வெற்றி என்பதற்கான மிக முக்கிய காரணம், ஊழல் என்பதை அடிப்படையாக வைத்து ஒரு கட்சி இந்தியாவில் வெற்றி பெற முடியும் என்பதே.   ஒரு அரசியல் கட்சியின் நிலைப்புத் தன்மைக்கும், அது தேர்தலில் போட்டியிடுவதற்கும், இந்தியாவைப் பொறுத்தவரை ஊழலே அடிப்படையாக உள்ளது.   கவுன்சிலர் தேர்தல் முதல், நாடாளுமன்றத் தேர்தல் வரை, கருப்புப் பணமும், ஊழல் பணமுமே அடிப்படையாக உள்ளது. அவ்வப்போது ஊழலுக்கு எதிராக குரல் கொடுக்கும் பெரும்பாலான கட்சிகள், இந்த கருப்புப் பணத்தை நம்பியே தேர்தலை சந்திக்கின்றன.   இந்த கருப்புப் பணம், பல்வேறு நில பேரங்கள், வரி ஏய்ப்புகள், மோசடிகள், ஊழல்கள் மூலமாக உருவாகி, மீண்டும் மீண்டும் தேர்தல் களத்திலேயே வந்து உழன்று கொண்டிருக்கிறது என்பதை அனைத்துக் கட்சிகளும் நன்றாகவே அறியும். இதன் காரணமாகவே, ஊழல் குறித்து பெரிய அளவில் எந்த கட்சிகளும் பேசுவதற்கு தயாராகவே இல்லை. ஒரு பலம் வாய்ந்த சட்டமாக உருவாகவிருந்த லோக்பால் சட்டத்தை அனைத்துக் கட்சிகளும் ஒன்று சேர்ந்து நீர்த்துப் போக வைத்ததே இதற்கான சான்று.

இப்படிப்பட்ட சூழலில் நேரடியாக ஊழல் எதிர்ப்பை களமாக அமைத்து, அதன் அடிப்படையில் ஆயிரக்கணக்கான தொண்டர்களை சேர்த்து, அதன் அடிப்படையிலேயே நிதி வசூலும் செய்து, இத்தேர்தலை வெற்றிகரமாக எதிர்கொண்டதன் மூலம், இந்தியாவில் நியாய உணர்வுகளும், நேர்மையும் முழுமையாக செத்துப் போய் விடவில்லை என்பதை நிரூபித்திருக்கிறார் கேஜ்ரிவால்.

இந்தத் தேர்தலின் வெற்றியில் கேஜ்ரிவாலின் தலைமைப் பண்பும், தந்திரங்களும் மிக மிக முக்கிய பங்கை வகித்தன. எந்த நேரத்தில் எதை செய்ய வேண்டும், எதை செய்யக்கூடாது என்பதை அறிந்தவனே தலைவன். கேஜ்ரிவாலின் ஒவ்வொரு அறிக்கையிலும், ஒவ்வொரு நடவடிக்கையிலும், ஊடகங்களும், எதிர்க்கட்சிகளும் பல்வேறு குறைகளைக் கண்டுபிடித்து ஆராய்ச்சி அறிக்கைகளை படைத்துக் கொண்டிருந்தாலும், கேஜ்ரிவால் எதைப்பற்றியும் கவலைப்படுவதாக இல்லை. அரசியலை கற்றுத் தேர்ந்தறிந்த நிபுணர் போல, பல்வேறு அதிரடிகளை நாள்தோறும் அரங்கேற்றிக் கொண்டுதான் இருந்தார்.   அவரின் இந்த செயல்பாடுகள், மக்களின் நாடித்துடிப்பை அவர் நன்கு புரிந்திருந்தார். என்பதையே உணர்த்தியது இதுதான் ஒரு தலைவனுக்குரிய அடிப்படை தகுதி. எல்லா அரசியல் கட்சித் தலைவர்களும், பாதுகாப்பான தொகுதியை தேர்ந்தெடுக்கையில், கேஜ்ரிவால் நேரடியாக மூன்று முறை முதல்வராக இருந்த ஷீலா தீட்சித்தோடு நேரடியாக மோதினார். அடுத்ததாக பாராளுமன்றத் தேர்தலில் நரேந்திர மோடியை எதிர்கொண்டார். அது வெற்றி பெற்றதோ வெற்றி பெறாமல் போனதோ, ஆனால், இந்திய ஜனநாயகம் கண்டிராத துணிச்சல் அது. அசாத்திய துணிச்சல்.

கேஜ்ரிவாலின் இந்த வெற்றி ஒரே நாளில் வந்தது அல்ல. ஐஆர்எஸ் அதிகாரி பதவி சுகிக்காமல், டெல்லியில் பரிவர்த்தன் என்ற அமைப்பைத் தொடங்கி, டெல்லி வாழ் மக்களின் அனைத்து பிரச்சினைகளையும் கையில் எடுத்து பணியாற்றினார்.   குறிப்பாக அதிப்படியான மின்கட்டணம், தண்ணீர் கட்டணம் போன்றவற்றில் உள்ள ஊழல்களை வெளிக்கொணர தகவல் அறியும் உரிமைச் சட்டத்தை பயன்படுத்தினார். கடுமையான மின் கட்டணத்தில் உள்ள ஊழல்களை வெளிக்கொணர தகவல் அறியும் உரிமைச் சட்டத்தை பயன்படுத்துமாறு பல்வேறு முகாம்களை நடத்தினார்.   முன்னாள் ஐஏஎஸ் அதிகாரி அருணா ராயோடு இணைந்து, தகவல் அறியும் உரிமைச் சட்டம் உருவாவதற்கான முக்கிய காரணமாக இருந்தார்.

இந்த அடித்தளமே அவர் மக்களின் மனதை புரிந்து கொள்ள உதவியது.   ஆனால் இப்படிப்பட்ட அடித்தளம் ஏதும் இல்லாத அரசியல் வாரிசுகள், முதல்வர் கனவில் துடிக்கின்றன.

ஆனால் இந்த வெற்றிக்குப் பின்னர்தான் கேஜ்ரிவாலுக்கான உண்மையான சோதனை இருக்கிறது.   ஆம் ஆத்மி கட்சியின் இந்த பிரம்மாண்டமான வெற்றி பல்வேறு மோசமான சக்திகளை ஆம் ஆத்மியை நோக்கி திருப்பக் கூடும்.   பிஜேபி, காங்கிரஸ் போன்ற கட்சிகளில் இருந்து பலர் ஆம் ஆத்மி நோக்கி பாயக்கூடும்.   அவர்களை முழுமையாக நிராகரிக்கவும் முடியாது. முழுமையாக ஏற்றுக் கொள்ளவும் முடியாது.   கேஜ்ரிவால் போல அவர் கட்சியில் உள்ள அனைவருமே இருப்பார்கள் என்றும் கூற முடியாது. தவறுகள் நிகழலாம்.   அதிகாரம் இல்லாமல் வீதியில் போராடுவது வேறு. அதிகாரத்தை அனுபவிப்பது வேறு.   அதிகாரம் அளிக்கும் போதை மனிதர்களை எப்படி மாற்றும் என்பதை அனுமானிக்கவே முடியாது.   அதிகாரம் கிடைக்காத காரணத்தால்தான் ஆம் ஆத்மி கட்சியில் இருந்த பலர் விலகிச் சென்றனர். இவர்களை கட்டி இழுத்து, அவப்பெயரை சந்திக்காமல் ஆட்சி நடத்துவது ஒரு சவால் என்றால்….   அளித்த வாக்குறுதிகளை நிறைவேற்றுவது மற்றொரு பெரிய சவால். மாநில அந்தஸ்து கூட இல்லாத டெல்லி, நிதி உட்பட அனைத்து விவகாரங்களுக்கும், மத்திய அரசை நம்பியே இருக்க வேண்டிய நிலை உள்ளது.   ஆம் ஆத்மி அரசுக்கு எல்லா உதவிகளையும் செய்யக்கூடிய பெரிய மனது படைத்தவரல்ல மோடி.   இன்னும் ஐந்து ஆண்டுகள் கழித்துதானே அடுத்த தேர்தல். அப்போது பார்த்துக் கொள்ளலாம் என்று பல நெருக்கடிகளை மோடி டெல்லி அரசுக்கு அளிக்கக்கூடும்.   அதையெல்லாம் கடந்து ஒரு சிறந்த ஆட்சியை நடத்துவது என்பது எளிதான காரியம் அல்ல.

மேலும், இந்த பிரம்மாண்டமான வெற்றியை அடுத்து, மேலும் பல மாநிலங்களுக்கு விரிவுபடுத்தலாம் என்ற ஆசை தோன்றக்கூடும். அது இயல்பே. ஆனால், டெல்லி சாதி என்ற ஒன்று இல்லாத மாநிலம். டெல்லியில் எந்தத் தொகுதியிலும் சாதி பார்த்து வேட்பாளர் நிறுத்த வேண்டிய அவசியமே இல்லை. ஆனால், தமிழகம் உள்ளிட்ட இந்தியாவின் பிற மாநிலங்களில் சாதி என்ற பூதாகரமான அமைப்பு முழுக்க பரவியுள்ளது. இந்த சாதியைக் கடந்து ஆம் ஆத்மி போன்ற கட்சியை வளர்ப்பது என்பது எளிதல்ல.   ஆகையால் அகலக்கால் வைக்காமல் நிதானமாக அடுத்த அடியை எடுத்து வைப்பது மிக மிக அவசியம். கேஜ்ரிவால் செய்வார் என்று நம்புவோம்.

ஆம் ஆத்மி கட்சியின் வெற்றி குறித்து பேசிய ஒரு மூத்த பத்திரிக்கையாளர் “ஆம் ஆத்மியின் வெற்றி, அனைத்து கட்சிகளுக்கும் ஒரு எச்சரிக்கை.   தங்களின் செயல்பாடுகளை அவர்கள் மாற்றியமைத்துக் கொள்ளாவிட்டால், காலத்தால் ஒதுக்கப்படுவர் என்பதை அவர்கள் உணர வேண்டிய தருணம் இது.   40 வருடங்கள் ஆட்சி நடத்தி காங்கிரஸ் அம்பலப்பட்டது. ஆனால் எட்டே மாதங்களில் பிஜேபி அம்பலப்பட்டுள்ளது.   மக்களிடமிருந்து விலகி, மக்கள் விரோதக் கொள்கைகளை கடைபிடிப்பவர்களுக்கு மக்கள் என்ன பரிசளிப்பார்கள் என்பதே டெல்லி தேர்தல் உணர்த்தும் ஒரு பாடம்.   ஆம் ஆத்மி கட்சியின் பரிசோதனை மற்ற மாநிலங்களில் செயல்படுத்துவது நிச்சயமாக எளிதல்ல. ஆனால், ஆம் ஆத்மி போல வேறொரு வடிவில் ஏதோ ஒரு சக்தி மாற்று சக்தியாக உருவாகும் வாய்ப்பு இருக்கிறது என்பதை, அனைத்து கட்சிகளும் உணர வேண்டும்.

அந்த புதிய சக்தி, மக்கள் விரோத பொருளாதார சமூக கொள்கைகளை கடைபிடிக்கும் கட்சிகளை தடுத்து நிறுத்தும் ஒரு அமைப்பாக உருவாகும்.   இத்தனை நாட்களாக காங்கிரஸுக்கு மாற்று பிஜேபி, பிஜேபிக்கு மாற்று காங்கிரஸ் என்ற நிலை இருந்து வந்தது. ஆனால் தற்போ இரு கட்சிகளுக்கும் ஒரு மாற்று உருவாகியுள்ளது. இது மற்ற மாநிலங்களில் இந்த வடிவிலோ வேறு வடிவிலோ உருவாகுவதற்கான சாத்தியக்கூறுகள் உண்டு என்பதையே டெல்லி தேர்தல் உணர்த்துகிறது.

இந்தத் தேர்தல் முடிவுகள் பிஜேபிக்கான மிகப்பெரிய எச்சரிக்கை. இந்தத் தேர்தல் தோல்வி கிரண் பேடியின் தோல்வி கிடையாது.   அவர் கட்சியில் சேர்ந்தே 20 நாட்கள்தான் ஆகிறது. இது மோடியின் தோல்வி. நாடாளுமன்றத் தேர்தலில் டெல்லியின் அனைத்துத் தொகுதிகளிலும் வெற்றி பெற முடிந்த பிஜேபி வெறும் மூன்றே இடங்களுக்கு தள்ளப்பட்டிருப்பது ஏன் என்பதை மோடி சுயபரிசோதனை செய்ய வேண்டும்.

பத்து லட்ச ரூபாய்க்கு உடையணிந்துகொண்டு மக்களிடமிருந்து விலகி இருந்தால் என்ன நடக்கும் என்பதை டெல்லி மக்கள் உணர்த்தியிருக்கிறார்கள்.

மேலும், மோடி வெல்லப்பட முடியாதவரே அல்ல என்று இது வரை இருந்த மாயையை இந்தத் தேர்தல் உடைத்துக் காட்டியிருக்கிறது” என்றார்.

ஆம் ஆத்மி கட்சியின் ஆட்சி எப்படி இருக்கப்போகிறது என்பதை பொறுத்திருந்துதான் பார்க்க வேண்டும். ஊழல் செய்து, சொத்துக்களை கொள்ளையடித்து, வழக்கை சந்தித்து, தண்டிக்கப்பட்ட பிறகும் மக்கள் முதல்வராக ஆட்சி நடத்துபவர்கள் உள்ள மாநிலம் இது.   கூச்சநாச்சமே இல்லாமல் கைதியை அதிகாரிகள் சந்தித்து உத்தரவுகளை பெறும் நாடு இது. இப்படிப்பட்ட ஒரு நாட்டில், ஊழலுக்கு எதிரான முழக்கத்தை முன்னெடுத்த ஒரு கட்சி, வெற்றி பெற்றிருப்பது பெரும் மகிழ்ச்சியை அளிக்கிறது.

இந்த வரலாற்றுச் சிறப்பு மிக்க வெற்றியை ஈட்டியுள்ள ஆம் ஆத்மி கட்சிக்கும், அர்விந்த் கேஜ்ரிவாலுக்கும் நம் அனைவரின் வாழ்த்துக்களும் உரியன.

வாழ்த்துக்கள் கேஜ்ரிவால்.